Mánudagur

Þá er Airwaves lokið og við tekur veturinn. Hátíðin í ár var mjög fín fyrir utan fáránlega langar raðir inn á suma staði þannig að maður komst ekki inn til að sjá það sem maður vildi. Á laugardagskvöldið lenti ég einmitt í því en var komin að Nasa um hálftíu og þá var fimmföld röð frá húsinu að Alþingi... Þá varð bara að virkja plan b og fara í Hafnarhúsið þar sem hin frábæru Zutons voru m.a. að spila. Mjög skemmtilegt!

Nú fer afsökunum hins vegar fækkandi fyrir því að klára ekki helv... nei, ég meina frábæra verkefnið mitt. Það koma dagar, og þeir eru reyndar fleiri en hinir, þar sem ég sit með störu á skjáinn og kem engu í verk. Legg nokkra kapla, blogga pínu, les blogg hjá öðrum, legg fleiri kapla, fer á leikjasíðu á netinu (úff, stórhættulegt!) og er svo að drepast í baki og öxlum á eftir. Spurning um að taka sér bara frí kl. 14:08! Halda svo áfram á morgun...